Ahad Qayum - Oqibatlik do'stlar

Men yashayman bezab dil qasrin,
Tushunay deb hayotning aslin,
Chin mehrga diydorga tashna-
Oqibatli do'stlar ko'paysin!
G'iybat qilmay turolmaslar ko'p,
Baxting kulsa ko'rolmaslar ko'p,
Yiqilsang hol so'rolmaslar ko'p,
Oqibatli do'stlar ko'paysin!
Bir so'z aytsang siringni ochib,
Jigarim deb dardingni sochib,
Yiqilganda ketmasin qochib,
Oqibatli do'stlar ko'paysin!

Do'stlar borki, manga'at kutgan,
Do'stlar borki, qo'lingdan tutgan,
Do'stlar borki, lavzin unutgan,
Oqibatli do'stlar ko'paysin!

Ko'rsa ko'ngil yashnab ketganda,
Sog'inganda, yo'ling kutganda,
Bir so'z bilan qisqa aytganda,
Oqibatli do'stlar ko'paysin.
Ahad Qayum yozgin dil yorib,
Yaqinlardan yurma hech nolib,
Yo'qlab kelar bir yodga solib,
Oqibatli do'stlar ko'paysin.
Men yashayman bezab dil qasrin,
Tushunay deb hayotning aslin,
Chin mehrga diydorga tashna,
Oqibatli do'stlar ko'paysin!